Hòmber Oustraliano tin patènt riba Hamdog, e kombinashon di hotdog i hamburger. (VIDEO)


Un hòmber oustraliano a logra di haña patènt riba un pan ku ta un kombinashon entre hotdog i hamburger. E la yama esaki e ‘Hamdog’. E idea pa e Hamdog a keda presentá dor di Mark Murray den e programa pa inventornan Shark Tank. Miembronan di hurado a bisa ku lo ta imposibel pa optené patènt pa e pan aki pasó lo tin mester di yudansa di abogadonan kostoso. Murray a logra haña patènt pa e pan kaba na Merka i awor na Oustralia tambe. Entretantu por haña e pan riba diferente merkado i tambe festival. E pan tin largura di un hotdog i hanchura di un hamburger. E hamburger ta partí na dos i mei mei e sosèshi di e hotdog ta kore. Riba esei ta bini kròpsla, tomati, keshi, ougùrk i tres diferente sous. Aktualmente ta traha e pan pa Hamdog na man den un panaderia na Perth. Esaki ta hasi ku e pan ta karu. Murray ta desaroyando un aparato kaminda por produsí e pan di forma masal. E hamdog ta kosta awoki mas o ménos 8 dòler oustraliano, ku ta 6.03 dòler merikano. Inventor di e Hamdog ta purba pa haña invershonista pa por bende su pan rònt Oustralia.