Awe Gobernadó Lucille George-Wout a risibí Kenneth Gijsbertha di Partido MAN. Gobernadó a tuma nota ku e partidonan MAN, PAR, PNP i PS a firma un akuerdo di disponibilidat i a pidi Gijsbertha pa riba termino kòrtiku mira si e partidonan ku a firma un akuerdo di disponibilidat lo por yega na un programa di gobernashon. Gobernadó a pidi pa partidonan tene na kuenta komo prioridat, drecha kalidat di enseñansa. Ademas pa esaki ta di akuerdo ku e nesesidat di merkado laboral. E situashon finansiero, partikularmente den e sektor di kuido i konstrukshon di hòspital nobo, tambe ta prioridat. Kombatimentu di kriminalidat i optimalisashon di e kuerpo polisial. Kresementu ekonomiko, ku atenshon spesial pa Isla. Mehorá maneho finansiero i kobransa di impuesto. Ademas mester traha riba e konfiansa di pueblo den e aparato públiko i tambe e relashon den reino, ta puntonan di atenshon pa Gobernadó. Ademas Gobernadó a pidi Gijsbertha pa aparte di e partidonan polítiko, papia tambe ku otro “stakeholder-nan” den kuadro di dialogo nashonal, CFT i otro instansianan relevante. Gobernadó pidi Gijsbertha pa djamars 18 di òktober duna un impreshon di kon e trabounan ta kana i pa mas tarda 25 di òktober e duna un reportahe final.