Debidamente Landsrecherche a skucha lider di MAN, Hensley Koeiman djis despues di resultado di elekshon, pero e no ta sospechoso. Ta trata di e kaso relashoná ku informashon ku a lèk for di un reunion di CFT. Parlamentario Amerigo Thode (MFK) ku tambe tabata den e reunion a haña un kondena pa violashon di su “ambtsgeheim”. Den e kaso a akusá otro parlamentarionan ku tabata presente durante e reunion, entre otro Hensley Koeiman i Alex Rosaria. Segun Ministerio Públiko ya a skucha Hensley Koeiman kaba den pasado i e loke a sosodé den e dianan despues di elekshon ta kontinuashon di e investigashon. Den kuadro di e investigashon, Landsrecherche bolbe skucha lider di MAN, pero a enfatisá ku e no ta sospechoso. Miéntras djadumingu Partido MAN, ta selebrá nan logro ku un karavana di viktoria ku lo pasa den diferente bario rònt Kòrsou. Di otro banda gobernadó tambe a start ku e ronda di informashon, pa skucha lider di kada partido ku a saka asiento durante elekshon ku a pasa. Den e dianan ku ta sigui, gobernadó lo mester nombra un informadó ofisial.