14582 (65%) hende a vota na St.Maarten. (VIDEO)


65% di votadónan na St.Maarten a hasi uso di nan derechi di voto. Un total di 14582 hende a presentá na 20 urnanan pa vota awe for di 8 di mainta te ku 8or di anochi. Awe e isla ta bai urna pa elehí e 15 parlamentarionan nobo. E dia a kana trankil sin niun insidente partikular. Na tur tin 126 kandidato ku a pone nan mes disponibel den elekshon na St.Maarten. Di e 9 partidonan ku ta partisipá den elekshon na St.Maarten, 3 di nan ta partidonan nobo. Ta trata di e partidonan HOPE (Helping Our People Excell), SMCP (St.Maarten Christian Party) i SDM (St.Maarten Development Movement), komo partidonan nobo.

Aparte di e partidonan nobo tin tambe USP (United St.Maarten Party) di Frans Richardson, DP (Democratic Party Sint Maarten) di Sarah Wescot-Williams, NA (National Alliance) di William Marlin, PPA (People Progressive Alliance) di Gracita Arrindell, UP (United People’s Party) ku Theodore “Theo” Heyliger i SPP (One St.Maarten People Party) di Lenny Piest.