Marion Cotillard a anunsiá su embaraso i a stòp ku e rumornan di un posibel romanse ku Brad Pitt. “Esaki ta bai ta mi promé i úniko reakshon pa loke ta e notisianan ku a sali den e último dianan ku m’a hañami aden”, asina e aktris a publiká djarason riba su Instagram. El a bisa ku e no ta kustumbrá di komentá ni tuma e tipo di kosnan asinaki na serio. Pero “e situashon a sali for di man i ta afektá hendenan ku mi stima, pues mi tin ku bisa algu,” Marion a bisa. Cotillard a afirmá su relashon largu ku aktor Guillaume Canet. E pareha ta mayornan di un yu hòmber di 5 aña. E la hasi menshon di su pareha i a referí na dje komo “e úniko ku mi mester” i a bisa aserka ku nan ta sperando un otro yu. Diferente informe lo a sugerí ku un posibel relashon entre Cotillard i Brad Pitt ta e motibu ku Angelina Jolie a pidi divorsio djaluna último. “E informe fabrika aki no ta spantami i pa tur media i otro hendenan ku mesora ta kuminsá huzga, mi ta deseá bosnan pronto rekuperashon”. Cotillard a bisa ku e ta spera ku Jolie i Pitt haña pas den e momentunan turbulento aki. Marion Cotillard a hunga den pelíkulanan manera Inception i a gana un Oscar na 2008 pa su aktuashon komo e legendario kantante franses Edith Piaf den e pelíkula La Vie en Rose. Pronto lo por mira Cotillard i Pitt komo protagonista den Allied.