Despues di 23 aña e orkesta di Gibi Doran ta stòp di eksistí komo GIO Fuertisimo. Tabata un desishon di e propio lider i doño di GIO pa stòp ku e agrupashon musikal. Segun Gibi, manera farándula lokal a bira aktualmente, no ta rendabel pa mantené un agrupashon musikal di tal nivel. GIO Fuertísimo tabata un empresa ku sigur 10 piku músiko di kua nan entrada tabata dependé di e banda. I si konsiderá kon e situashon ekonómiko a afektá farándula lokal, ya no por a sigui mantené e orkesta. Apénas fiestanan ta yega algun shen fanátiko últimamente. Ademas e guera i rivalidat ku tin den e mundu farandulero tambe a kontribuí na e desishon lamentabel.
Definitivamente GIO Fuertísimo ta un dje agrupashonnan musikal mas grandi ku Kòrsou a konosé i ku pa 23 aña largu sin stòp a deleitá Kòrsou i su fanátikonan. Durante e trayektoria aki, na vários okashon GIO a konosé éksitonan grandi den reino. E agrupashon musikal a presentá praktikamente den tur skina den reino. Tur promotor i organisadó di fiesta i aktividat tabata sa ku GIO ta un banda takiyero, komo tal den tur evento grandi GIO ta tei. Den Festival di Tumba ku ta e tarima prinsipal di farándula na Kòrsou, GIO tabatin un presensia dominante ku na numeroso okashon e Rei di Tumba den nan fila. Último lunanan a surgi basta rumor rondó dje banda, pero nada no tabata definitivo. Tabata durante un reunion den e siman aki, ku lider i doño di GIO, Gibi Doran a yega na e desishon dífisil pa stòp ku su agrupashon musikal. E desishon akí tabata un slá fuerte pa e músikonan i sigur pa farándula di Kòrsou. Yu hòmber di Gibi, esta Dibo Doran den un entrevista emoshonante na Radio MAS 99.7 FM a splika ku e no sa ainda kiko e ta bai hasi. No opstante ku su tata a pidié públikamente pa keda den farándula lokal. Te ku 30 di desèmber awor fanátikonan por sigui gosa di GIO Fuertisimo. Klek riba foto abou pa skucha lider i doño di GIO, Gibi Doran i Dibo den entrevista na Radio MAS 99.7 FM
