Instagram Vs. Snapchat


Den e dianan tras di lomba Instagram su funshon di "Stories", a provoká tantu komparashon komo krítika pa e karakterístikanan similar na esnan ku Snapchat ya ta ofresé. E rivalidat entre e dos plataforma sosial aki ta konstante. Luna pasá Snapchat a lansa e "Memories", ku originalmente tabata un funshon di Facebook. Facebook a kumpra Instagram na 2012. E propósito di e funshon nobo ta pa atraé siguidónan pa publiká i kompartí imágen via un sistema ku ta pone esakinan disparsé despues di tempu kòrtiku. 
Instagram 'Stories' ta permiti e usuario kompartí imágenanan ku e por personifiká ku ilustrashon, teksto òf 'emojis'. E aplikashon ta ofresé e usuario e posibilidat pa editá e potrèt ku e ta bai publiká ku diferente filter, miéntras ku e usuario por saka un 'selfie' dor di djis mishi ku e pantaya. Esaki ta un opshon ku Snapchat ya ta ofresé. E funshon nobo aki di Instagram no ta pèrmití siguidónan indiká ku nan a gusta e imágen, ni nan no por laga komentario atras. Ademas kada istoria ta keda wardá pa un máksimo di 24 ora. Despues di esaki e imágennan (istoria) ta disparsé di e kronologia di e usuario. Den kaso di Snapchat, e echo ku e publikashonnan ta temporal ta un di su karakterístikanan prinsipal. Si e usuario su kuenta di instagram ta públiko i e disidi di publiká un imágen, tur su siguidónan lo tin akseso na esaki, miéntras ku Snapchat mas bien ta un aplikashon di mensahe instantáneo. Ta uza Snapchat prinsipalmente pa komparti eksperiensia personal di e usuario ku su siguidónan, pero tambe tin e opshon pa e usuario manda potrèt i video pa ún solo usuario.