Hillary Clinton ta na kabes den enkuestanan.


Hillary Clinton di e partido demokrata tin un bentaha riba su oponente repúblikano Donald Trump, den e tres di e estadonan ku Trump ta konsentrá riba dje den su empeño pa bira siguiente presidente estadounidense. Esaki sigun resultadonan publiká despues di e asamblea di ámbos partido den e simannan tras di lomba.

E estadonan New Hampshire, Pennsylvania i Michigan a vota pa e partido demokrátiko den último elekshon. Sinembargo e situashon ekonómiko na e estadonan akí por resultá awor den un bentaha pa e partido republikano di Trump.

Sigun enkuestanan Clinton su reputashon a subi despues di e asamblea, miéntras Trump ta pèrdiendo apoyo di un kantidat grandi di republikano den e estadonan aki.

Enkuestanan nobo ta mustra ku Clinton tin un bentaha di 15 punto riba Donald Trump na New Hampshire. E enkuesta ta mustra tambe ku Clinton tin apoyo di 86% di e demókratanan i 14% di e republikanonan. Esaki ta kontrali na Trump ku tin apoyo di 63% di republikanonan versus 4% di demókratanan den e estado aki. Clinton su bentaha na Pennsylvania ta debí na kambio di opinion di votadónan despues di a wak e asamblea di e partido demókrata. 62% di esnan ku a sigui e asamblea a bisa ku probablemente nan lo vota pa Hillary Clinton. Únikamente 40% di esnan ku a sigui e asamblea republikano lo vota pa Donald Trump. A kondusí e enkuesta na Pennsylvania entre 29 di yüli pa 1 di ougùstùs bou di 661 votadó registrá. Na estado di Michigan e enkuestanan ta mustra ku mayoria votadó, esta 61% ta di opinion ku Trump ta mal prepará pa ta e próksimo presidente di Merka.