Deportistanan ruso, ku último dianan a tende di nan federashon di deporte internashonal, ku nan por partisipá na e Weganan Olímpiko na Rio, awor tòg no ta sigur di nan partisipashon. Den pitu IOC a instalá un kuerpo di hurado konsistiendo di tres persona ku lo duna e veredikto final.
Ta trata di e tres ekspertonan, e aleman Claudia Bokel, e turko Ugur Erdener i e spañó Juan Antonio Samaranch jr. E dianan ku ta bini nan lo pasa dor di tur e desishonnan ku kada federashon apart a tuma. E hurado lo bini ku su propio huisio, ku lo destrui òf afirmá e desishonnan tumá anteriormente dor di e federashonnan. E pènel tin un trabou grandi, paso mester trata kaso di mas di dosshen deportista, faltando apenas algún dia promé ku e seremonia di apertura.
Tur deportista ruso ku ke partisipá na e Weganan, mester kumpli ku eksigensianan severo di IOC. Manera den e último seis lunanan nan mester a ser di tèst riba ‘doping’ minimalmente un biaha pafó di Rusia i den pasado nan no ta’tin mag di ser gará riba uso di supstansianan stimulante.
Entretanto mayoria di federashonnan deportivo a tuma un desishon.
Di kasi 400 atleta ruso 100 no ta bon biní na e Weganan Olímpiko.