Crazy Diamonds a habri inskripshon pa karnaval 2017.


Grupo di karnaval Crazy Diamonds ofisialmente a habri inskripshon pa Karnaval 2017. Djasabra mainta na Curaçao Zoo (Dierentuin) tur esnan intresá por a pasa pa registrá i tuma mas informashon. Tabata reina un ambiente dushi entre e miembronan eksitente i direktiva di e grupo. For di tempran a kuminsá risibí esnan intresá, ku por a wak e trahe pa 2017 i tuma informashon. Crazy Diamonds a hasi presentashon di nan trahe algun siman pasá. E tema ku nan lo presentá ta “Selebrá Bida”. Un idea saká for di e pelíkula di animashon “The Book of Life” i kombiná ku e fiesta tradishonal mehíkano kaminda ta selebrá bida di tur ku a bai promé.

E trahe ta unu hopi kolorido ku un super makiyahe ku ta duna e toke spesial na e tema. Crazy Diamonds manera semper ta trese tema nan atrebí i ku un toke diferente.

Pa e Gran Marcha benidero lo tin un sekshon nobo “Blue Diamonds” ku ta na enkargo di Bert Isenia. E sekshon akí ta spesial pa personanan ku ke bisti un trahe individual pa asina lusi durante di e marchanan. E sekshon akí ta animá pa e popular DJ RO-1. Pa inskribí ta kosta 50,- florin. Lo deskontá e suma akí for di bo trahe. Pa partisipá den Crazy Diamonds ta kosta 1.150,- florin (inkluso makiyahe i furu di sapatu). Durante marcha di karnaval 2017, Crazy Diamonds lo tin tambe animashon di DREAMS 2. Pa mas informashon por yama libramente na 516-7828 òf imeil na crazydiamondscuracao@gmail.com Por “like” tambe e página di Facebook Crazy Diamonds Curaçao. Klek riba imagen pa mira foto grandi