Kasi shen prominente personahe di e industria di entretenimentu merikano a forma un ‘koalishon’ bou di e nòmber “United Against Hate” kontra e kandidato presidensial republikano Donald Trump.
Bryan Cranston, Kerry Washington, Chloei Grace Moretz, Samuel L. Jackson, Mark Ruffalo, Michael Moore i Lena Dunham ta entre otro esnan ku a firma un petishon ku e titular “Abo ta lanta kontra Trump i e odio ku e ta promové?”
Segun Deadline e artistanan ta skibi den un karta habrí: “Nos ta kere ku ta nos responsabilidat pa usa nos plataforma pa hala atenshon pa e peliger di Trump komo presidente. Donald Trump kier hiba nos pais bèk na e tempu kaminda miedu tabata sòru pa violensha, kaminda kudishi tabata trese diskriminashon i kaminda estado tabata inkorporá prehuisio riba komunidatnan marginá den lei.”
Neil Patrick Harris, Woody Harrelson, Julianne Moore i Shonda Rimes di Grey’s Anatomy tambe a firma e petishon.
Segun esnan ku a firma tin un lista den e dokumento, di gruponan ku a laga afó i ku Trump a perhudiká.
“Algun di nos ta pertenesé na e gruponan ataká dor di Trump. Algun nò.
Pero historia a prueba, ku hopi bes ta kuestion di tempu pa ‘e otro’ kambia den ‘ami’.
E koalishon ta finalisá hasiendo un petishon. “Nos ta pidi kada merikano pa para tras di nos, pa para na e banda bon di historia, pa usa e forsa di nos voto pa derotá Donald Trump i e ideologia odioso ku e ta para p’e.