REPORTAHE : Rekorido i entiero di Pastor Norwin Josepa.(foto/video)

Djaluna mainta promé ku 11or, a kuminsá ku e proseso pa despedida di Pastor Norwin Marcus Josepa (59). For di tempran un kantidat grandi di miembronan di Iglesia Bida Abundante a presentá na nan iglesia ku ta keda den e edifisio pegá ku Palu Blanku (direkshon di Santa Maria) pa warda e wa di morto yega pa por despedí di manera digno di nan Pastor. E korteho fúnebre a sigui despues via Rooseveltweg pa Radio MAS 99.7 FM. Pa mas ku 14 aña Pastor Norwin tabata presentá su programa tur mainta na Radio MAS 99.7 FM. Nataly Antonia, direktor dje radio a papia i mustra riba e importansia di Norwin pa e emisora. Norwin tabata un pilá, serka kua den momentu di mesté’ semper por a buska sosten. Tantu di parti di gerensia komo koleganan. (klek riba foto pa wak imágen grandi) (kortesia Radio MAS/Redakshon)

Den kurá di Radio MAS na Fosfaatweg den Goede Hoop, e wa di morto a keda pará un ratu di manera ku tur kolega por a tuma despedida di Pastor Norwin.

Despues di e seremonia kòrtiku pero bunita, e korteho fúnebre a bandoná kurá di Radio MAS i ku tur rèspèt a baha bandera na momentu ku e wa di morto tabata alehá.

Via Rooseveltweg a sigui pa e akto di despedida na korant Extra. Pa hopi aña Pastor Norwin a traha na Drukkerij De Stad i tambe korant Extra. Koleganan a sali for di nan ofisina pa warda Norwin yega.

Dilanti di e edifisio di korant Extra, su koleganan tabatin blas i pankarta pa na nan manera yama ayó na e hòmber ku pa hopi aña a traha mei mei di nan. Na despedida di e Wa, su koleganan a laga blasnan blou i blanku bai den laira.

Miéntras ku e wa di morto tabata pasa den Roodeweg pa subi seru di Otrobanda, ya su koleganan di La Prensa i Último Notisia tabata pará den kaya huntu ku otro bisiña i koleganan ta warda yegada di Pastor Norwin.

Na yegada di wa, koleganan a subi kaya pa por a yama Norwin ayó.

Por a nota e tristesa i doló serka su koleganan di La Prensa i Último Notisia tambe, na momentu ku pa último biaha, Norwin a pasa den kaya di Ser’í Otrobanda.

Finalmente e rekorido pa duna honor na Pastor Norwin a yega El Tributo kaminda un multitut enorme a presentá pa por a despedí di Pastor Norwin Marcus Josepa (59). E tabata un hende di tur hende i komo tal awe hopi hende for di tur gremio den komunidat a bin yam’é ayó.(Fotonan paden kortesia Darwin Borgschot/Radio MAS)

Tantu dilanti komo paden di El Tributo tabatin filanan largu pa por a despedí di Pastor Norwin.

Tabatin hopi tènt dilanti, di manera ku e multitut grandi ku a presentá na entiero di Pastor Norwin, por a para den fresku warda pa por a drenta den e sala grandi di El Tributo, ku por sierto a hasi un tremendo trabou den kordinashon di despedida.

Despues a sali ku Pastor Norwin pa hib'é su último lugá di sosiegu. (Fotonan paden kortesia Darwin Borgschot/Radio MAS)

Pastor Norwin, sosega na pas.