Glen Sulvaran ta papiando ku PAIS.


Den e dianan ku a pasa Parlamentario Glen Sulvaran a papia ku un delegashon di PAIS. Asina fuentenan yegá na e partido ta indiká. No solamente, Sulvaran, pero tambe otro personanan yegá na Sulvaran lo ta den kombersashon ku e komishon ku ta enkargá ku formashon di lista pa PAIS. Lo mester tabata remarkabel pa Sulvaran pa topa na otro banda di mesa, su èks kolega den PAR, Pedro Atacho, asina un fuente yegá ta splika. Atacho ya pa un tempu kaba ta miembro di PAIS i huntu ku Michael Samson ta enkargá ku formashon di lista. Algun tempu pasá Sulvaran a deklará ku e lo ta intresá pa bai PAR bèk. Sinembargo lider di PAR, Zita Jesus-Leito a pone bon kla, ku PAR a sera tur porta pa Sulvaran, despues ku na 2012, el a kibra ku e partido pa bira independiente i drenta gobièrnu. Sulvaran su motivashon tabata, ku e kier a hasi tur su posibel pa tene Gerrit Schotte i MFK for di gobièrnu e tempu ei. E mesun motivashon e tin awor atrobe pa elekshon 2016. Komo tal e Parlamentario ta papiando ku PAIS, pa mira si por yega na akuerdo, debi ku e loke sigui den gobernashon i mantené su kandidato José Jardim komo Minister di Finansas den un posibel periodo nobo di gobernashon.