MP di Marilyn Moses ta habri sede ku tim hóben.(video)


Movementu Progresivo (MP), e partido nobo di miembro independiente di parlamento señora Marilyn Moses, a hasi apertura di su sede nobo na Schottegatweg Oost 142-A na Saliña. Marilyn Moses a splika ku mester tin hopi énfasis riba e hóbennan:“Un komunidat ku ta fortifiká su hóbennan, ta un komunidat ku ta pensa riba futuro. Kòrsou tin 50.000 hóben i si nos fortifiká nan nos sa ku ta nan ta esnan ku lo bai produsí mañan.”

VIDEO : Lider di Movementu Progresivo ta splika parti di e vishon di su partido nobo. Movementu Progresivo ke enfoká tambe riba atenshon i protekshon pa nos grandinan, atraé invershonista for di ekstranhero pa Kòrsou, kuido médiko pagabel, engradesé turismo i subi e nivel di bida en general na Kòrsou. Algun di e hóbennan ku ta forma parti di e direktiva òf ta miembro di MP ta entre otro Muriëll Mambre, Egbert Veeris i e konosido kantante Hunneley Felicia.

Hunneley Felicia a presentá durante e apertura di e sede huntu ku agrupashon Dreams, kual e ta asosiá na dje. Na final di Dreams su presentashon Hunneley a anunsiá ku e tambe ta forma parti di Movementu Progresivo. “Nos a kombersá basta i e la splikami su vishon. Nos ta riba e mesun liña.” “A yega un momento ku m’a bisa mi tambe ke djòin, i sòru pa nos ban trese kambio.”

VIDEO : Hunnely Felicia ta splika parti di e vishon ku Movementu Progresivo. No ta konfirmá ainda ku Hunneley Felicia ta riba e lista di Movementu Progresivo. Movementu Progresivo ta un di e partidonan ku lo mester partisipá na e Pre-Elekshon, dianan 22 i 23 di Ougùstus. Anteriormente Marilyn Moses a forma parti di frakshon di Partido PAIS. Aña pasá novèmber e la entregá su retiro i a sigui komo miembro independiente den Parlamentu. Den su promé partisipashon den polítika na 2012 Marilyn Moses a haña kasi 700 voto pèrsonal.