Konket no ta kere den un sistema Parlamentario manera Sint Maarten.


Parlamentario pa PAR, Armin Konket no ta haña ta bon idea pa bini ku un sistema Parlamentario manera esun di Sint Maarten. Segun e sistema na Sint Maarten, un kandidato por drenta Parlamentu basá riba e kantidat di voto ku e haña den elekshon i no basá riba su puesto riba lista. “Segun nos sistema partidonan ta e oportunidat pa krea un balansa entre ken por hala voto i ken tin e kapasidat pa hasi e trabou. Ta bon pa evaluá un sistema asina promé. Den un sistema asina, kampañanan ta bira mas pèrsonal i lider ta pèrdè grep riba e kandidatonan, loke ta suak e struktura di partido”, asina Konket a deklará. Último tempu tin mas hende ta boga pa un sistema manera Sint Maarten tin i p’esei Konket ke ta kouteloso. Ademas e Parlamentario pa PAR ta haña ku un sistema asina lo tin komo konsekuensia kanibalismo politiko, esta ku lo surgi un konkurensia entre kandidatonan di e propio partido.