E tradishonal “Vierdaagse” di Nijmegen a start.


E di shen edishon di e “Vierdaagse” di Nijmegen a start ku mas o ménos 47 mil partisipante. E promé dia di e kaminata yama “Dag van de Elst”. Elst ta un pueblo den bisindario di Nijmegen. Tur dia tin un dia nobo durante di e “Vierdaagse”. E di dos dia yama “De dag van Wijchem”, e di tres dia “De dag van Groesbeek” i e último dia “De dag van Cuijk”. Partisipantenan por skohe pa kana entre 4 distansia, sea 30, 40, 50 òf 55 kilometer.

Pa 4or di mardugá e partisipantenan di 55 kilometer a kuminsá kana. A agregá e distansia akí en konekshon ku e di 100 edishon di e “Vierdaagse”. Partisipantenan riba e otro distansianan por a kuminsá kana 8or di mainta.

Sigur un 700 boluntario di Krus Kòrá ta pará kla pa asistí e kanadónan durante e ruta, sea pa trata bral òf otro malestar ku por surgi. Ta spera ku e promé dia lo ta un dia ku hopi solo i temperaturanan entre 13 i 25 grado, ku tiki bientu. E “Vierdaagse” di Nijmegen ta e kaminata di mas dia, esun di mas grandi na mundu i e aña akí 68 nashonalidat ta partisipá. Riba e último dia Rei Willem Alexander lo bishita e “Vierdaagse”.