Diskurso di Melania Trump parse esun di Michelle Obama na 2008.


E diskurso ku Melania Trump, kasá di Donald Trump, na apertura di e konvenshon Republikano, a kousa basta reakshon. E Republikanonan ta reuní na e siudat di Cleveland e siman akí pa ofisialmente apuntá nan kandidato presidensial. E diskurso di Melania tin hopi similaridat, na e spich ku Michelle Obama a duna na 2008 durante e konvenshon Demokrátiko. Ya media merikano ta papia di posibel plagio. E kasá di Donald Trump a bisa den un entrevista promé ku e konvenshon ku e mes a skibi su diskurso ku ménos yudansa posibel. Ora kompará imágennan i teksto di e dos diskursonan, por mira ku sierto palabranan i frasenan parse otro. Melania Trump a uza e mesun palabranan, ku Michelle a usa pa deskribí su hubentut. Den un parti di su spich e ta papia di balor i moral, den e mésun sekuensha ku Michelle.

E tim di kampaña di Trump a saka un reakshon mesora pa bisa : “Pa skibi e bunita diskurso di Melania, e tim di eskritor a keda guiá pa inspirashonnan di su bida i fragmentunan di su propio pensamentunan”, segun un bosero. “Melania su pasado komo imigrante i su amor pa Estádos Unídos ta opvio den su diskurso i el a logra pa hasi di esaki un gran éksito.”

VIDEO : Komparashon entre spich di Melania Trump (2016) i Michelle Obama (2008)