Den fin di siman Wardakosta a haña 128 kilo ta drif riba laman den bisindario di St.Maarten. Tabata djabièrnè ku e barku militar Zr.Ms.Groningen a interseptá un boto sospechoso ku tabata move riba velosidat haltu i sin lus, direkshon di e isla di St.Maarten. A bin topa dos hòmber riba e boto, miéntras ku un otro di nashonalidat venezolano tabata den awa. El a splika outoridatnan ku e boto ku e i kuater otro amigunan tabata ariba a senk. E kondishon den kua e hòmber tabata a lanta sospecho ku su istoria no ta real i komo tal a inspekshoná e área, pero no a haña nada. A hiba e hòmbernan St.Maarten i despues ku paramédikonan a kontrolá nan i a entregá nan na polis. Tabata e siguiente dia, ku outoridatnan a mira varios bulto ta drif. A resultá ku tabata bultonan di kokaina. Na tur a konfiská 128 kilo di kokaina i mesora a konektá e droga na e grupo ku tabata riba laman un dia promé. A detené nan mesora i e investigashon ta kontinuá.