Warner Bros. ta pone e pelikula ‘Just Mercy’ gratis ‘online’ pa tira lus riba rasismo sistematiko.


Hollywood - Den afan pa tira lus riba e deskriminashon sistematiko, e kompania di sine Warner Brothers a pone e eksitoso pelikula ‘Just Mercy’ gratis pa tur hende mira via plataformanan digital. ‘Just Mercy', ku tin komo protagonosta Jamie Fox i Michael B.Jordan, ta basá riba susesonan real di esfuersonan di e abogado aktivista Bryan Stevenson pa bringa inhustisia rasial na Merka. E pelikula ta derivá for di e buki ‘Just Mercy, A Story of Justice and Redemption’. Durante e dianan di protesta masal rònt Merka relashoná ku morto di George Floyd, e buki a bolbe bira un ‘best seller’. Den un deklarashon ofisial, Warner Brother a bisa ku nan ta spera ku e pelikula, ku a sali na 2019, lo kontribuí na duna un bista mas real di e situashon di rasismo sistematiko na Merka. Durante hinter luna di yüni tur hende por wak e pelikula gratis ‘online’.