E ministerio di salubridat rusiano a aprobá uzo di e promé bakuna kontra COVID-19. Asina ku e último fase di tèstnan finalisá, Rusia ke kuminsá ku bakuna masal. Entretantu World Health Organization a pidi Rusia pèrmit pa por kontrolá e bakuna.
E presidente rusiano Vladimir Putin a splika ku e bakuna ta sigur i hasta su propio yu muhé a risibí esaki sin efektonan partikular.
Putin ta projektá ku pa novèmber e bakuna lo mester ta riba merkado mundial. Sinembargo sientifikonan ainda ta poko skèptiko riba e bakuna rusiano, debí ku Rusia no a kompartí nan informashon ku sientifikonan di otro paisnan.
Rusia ta pensa pa asina nan haña aprobashon di outoridatnan di salubridat, kuminsá ku produkshon di e bakuna na entre otro Brazil i otro paisnan den latino amerika tambe. E bakuna rusiano lo yama Spoetnik V i Rusia ta pensá na produsí 500 mion dje bakuna pa aña. Na Rusia mes, lo start den luna di òktober próksimo ku un kampaña intensivo di bakuna. Si tur kos kana segun plan, Rusia lo bira e promé pais ku tin un bakuna efektivo kontra COVID-19.