Poekie Alberto, un dje lidernan di partido KEM a tuma retiro.


Willemstad - Den un buelta sorprendente, un di e dos lidernan i fundadó dje partido polítiko nobo KEM, Poekie Alberto a tuma su retiro dje organisashon. Den un karta dirigí na direktiva di e partido, Alberto a splika ku diferensia den idiologia i e sentimentu di divishon, ta e motibunan pakiko e ta distansiá su mes di KEM [Partido Kòrsou Esun Mihó]. Segun informashon èkstraofisial, e retiro di Poekie tin di haber tambe e desishon riba kua di e dos eksponentenan prinsipal lo mester a bira ofisialmente lider dje partido.


Na dezèmber di 2019, partido KEM a kuminsá profilá su mes na momentu ku durante un Konferensia di Prensa, Michelangelo ‘Low’ Martines, Eldrin ‘Poekie’ Alberto i demas miembronan a anunsiá nan partisipashon na elekshon 2021.


Retiro di Poekie Alberto, ku a bin ta profilá komo lider di KEM a kousa ku e otro miembronan Giancarlo Hernandez i Jadira Bislick tambe a anunsiá nan retiro for di e partido.


KEM no a duna un deklarashon ofisial ainda riba e retiro di Alberto.