No tin garantia mas ku Grupo Klesch lo tuma operashon di refineria.


Willemstad - Durante un reunion ku trahadónan di refineria, ku a tuma lugá e siman akí na Curacao Festival Centre, RDK a duna di konosé ku ya no tin garantia mas ku Grupo Klesch lo tuma operashon di e refineria ofer. Segun direktor di RDK, Marcelino ‘Chonky’ De Lannoy, nan a spera ku den e seis (6) lunanan, lo a yega na un akuerdo konkreto ku e partner strategiko pa tuma e refineria, pero debí na e situashon di COVID-19 esaki no a logra. Entretantu a gasta masomenos ocho (8) mion na e projekto Arowak pa purba yega na un akuerdo ku un operadó nobo. Na fin di yüni awor, lo mester manda trahadónan kas. Segun De Lannoy tin intresadó den e refineria na Kòrsou, pero no ta tur ta mes serio. Durante e reunion tabatin trahadónan hopi rabiá riba tantu RDK, komo e sindikatonan PWFC i APRI ku no e representá nan debidamente, na nan opinion. E situashon ta bastante delikado, debí ku sin garantia di trabou, Kòrsou lo por pèrdè tambe hopi di su profeshonalnan den e ramo di industria petrolero.