Presidente merikano Donald Trump a firma un klousula pa den 45 dia eliminá e popular plataforma sosial Tik Tok. Esaki ta nifiká ku despues di e periodo akí usuarionan na Merka lo no tin akseso mas na e ‘app’ Tik Tok. Aparte di Tik Tok, e otro aplikashon di origen chines WeChat tambe lo deskonektá pa pueblo merikano.
Segun gobièrnu merikano e dos èpnan chines ta kolektá informashon di poblashon merikano i esaki por ta un peliger pa seguridat nashonal, segun Trump. E uniko manera pa logra skapa alomenos Tik Tok for di e prohibishon merikano, ta si e intenshon di e kompania Microsoft pa kumpra e aplikashon, kristalisá promé ku e periodo vense.