Maarten Schakel ta pasa di Dolfijn pa Paradise FM.

Willemstad - Entrante yüli 2020, e popular lokutor Maarten Schakel ta pasa di Dolfijn pa su kompetidor, e emisora ulandes Paradise FM. Despues di mas ku 15 aña presentando diferente programa riba Dolfijn, Maarten a anunsiá via su pagina di Facebook ku e ta bai pa un reto nobo na Paradise FM. E idea ta pa huntu ku su èks kolega na Dolfijn, Joris Reer e duna un man den maneho di strategia na e emisora. Aparte di esaki Maarten lo sigui ku presentashon di su programanan na radio tambe. Maarten lo kuminsá ku presentashon di un ‘morning show’ nobo riba Paradise FM. Ademas lo e duna su kontribushon den notisia i topíkonan di aktualidat.

Den pasado Maarten a partisipá na Festival di Tumba di Kòrsou i ta aktivo den Curaçao Clean Up. Shakel ta bira e di dos lokutor di promé ora ku bandona Dolfijn FM den korto tempu. Algun luna pasá, Egon Sybrandi, ku ta otro pionero den eksito di Dolfijn FM, tambe a skohe pa un otro rumbo. E fecha eksakto ku Maarten lo start su presentashon riba Paradise FM ainda no ta konosí.