Korte Supremo a duna Bill Cosby libertat.


Pennsylvania - Korte Supremo na Pennsylvania a deklará ku e popular kómiko Bill Cosby (83) ta hòmber liber. Segun e korte, e íkono kómiko no a haña un proseso hustu. Na 2018 Cosby a ser kondená ku un kastigu di prizon di entre 3 pa 10 aña, despues ku su antiguo asistente Andrea Constand a akusé di habuzu seksual. Wes a haña Cosby kulpabel di a droga i abuza di e muhé na su kas.


Korte Supremo na Pennsylvania a disidí na sentensiá di nobo riba dos aspekto den e kaso di Cosby. E promé ta e desishon di wes pa, aparte di e deklarashonnan di Constand, pèrmití sinku otro dama adishonal di testiguá den kaso. Esaki tabata un desishon robes, debí ku durante e promé tratamentu di e kaso, wes a deklará ku lo por tin solamente ún testigu adishonal. E kuerpo di hurado durante e promé tratamentu, no a logra yega na un desishon final i a bolbe kuminsá ku un kaso nobo kontra Cosby. Segun Korte Supremo e kaso a keda kontaminá, debí ku pèrmití mas ku ún testigu. No opstante ku tur e testigunan a indiká un patronchi den e komportashon di Bill Cosby. Aparte di esaki, Korte Supremo a konsiderá tambe, ku den pasado Cosby a sera un akuerdo ku hustisia pa nunka despues e ser sentensiá.


Na 2015 a kuminsá un proseso tòg kontra Bill Cosby. El a keda akusá pa Constand i varios otro muhé di abuzu seksual. Sinembargo hopi di kasonan a kaduká despues ku añanan a pasa. No ta konosí ainda si e demandantenan lo bai den apelashon kontra e desishon di Korte Supremo òf si lo kuminsá un proseso nobo kontra ‘America’s Dad’.