Guadaloupe - Na komienso di yüli, Jacob Desvarieux, e ko-fundadó di popular banda di musika 'zouk', Kassav, a drenta hòspital na Pointe-à-Pitre pa un chekeo di rutina i a tèst positivo pa Covid-19. E artista a keda interná den kuido intensivo mesora. Desvarieux tabata kai den kategoria di personanan di riesgo haltu, konsiderando ku na 2008 el a hasi un transplante di nir i ademas ta diabétiko. Despues ku a pone Desvarieux den koma artifisial, lamentablemente e no a logra rekuperá i fayesé na edat di 65 aña na Guadaloupe.
Desvarieux, a nase na Paris i lanta entre e islanan di Guadaloupe i Martinique kaminda el a kuminsá toka for di tempu e tabata chikí. Tabata na final di aña shetenta, ku Jacob huntu ku Pierre-Edouard Decimus, su ruman Georges Decimus i Freddy Marshall a forma e banda Kassav i kuminsá popularisá ku nan estilo karibense úniko den e genero di musika 'zouk'. Na 1979 nan a lansa nan promé album. Na 1980 Jocelyne Béroard tambe ta djòin e banda i asina varios miembro di Kassav a sigui. Hopi di miembronan di Kassav a lansa tambe nan propio produkshonnan tambe komo solista. Pero ta na 1984 riba e album Yélélé, ku Kassav ta lansa nan hit di mas grandi ‘Zouk La Sé Sèl Médikaman Nou Ni’, ku ta pone e banda riba mapa mundial. Eksito di e tema akí ta hiba Kassav, Merka, Afrika, Japón i hasta Rusia pa diferente presentashon.
Kassav a sigui produsí hopi hit grandi i na varios okashon e banda a presentá eksitosamente Kòrsou pa tantu fiesta bailabel komo konsiertonan grandi. Un dje promé presentashonnan di Kassav na Kòrsou tabata den un fiesta bailabel, mano-a-mano ku e banda lokal Name (fundá den añanan 80 pa dòkter Roy Herenveen). Na varios okashon, e promotor lokal Mocky Job a logra pone rèkòrt na asistensia di riba diesmil hende den Curaçao Festival Centre pa mira i disfrutá di Kassav. Otro presentashon grandi di Kassav na Kòrsou tabata durante Curacao North Sea Jazz na 2016. E último biaha ku Kassav a presentá na Kòrsou tabata pa apertura di Karnaval 2019 riba Kleine Werf dilanti un públiko grandisimo atrobe.
2019 tabata hustamente e aña ku Kassav a kuminsá nan gira pa selebrá 40 aña di e banda di kuá hopi di su musikonan orginal ainda, formando parti di e agrupashon musikal.
Jacob Desvarieux tabata kasá ku hustamente e vokalista prinsipal di Kassav, Jocelyne Béroard. Pas na su restunan.