Floyd Mayweather lo paga gastunan di entiero di George Floyd.


Minneapolis - E bòksdó multi mionario Floyd Mayweather a ofresé pa paga e gastunan di entiero pa George Floyd. Asina e CEO di Mayweather Promotions, Leonard Ellerbe a bisa ESPN. E entiero di George Floyd, ku a fayesé durante un aresto polisial na Minneapolis, ta planiá pa tuma lugá dia 9 di yüni. E famia di George Floyd a deklará ku nan ta aseptá e propuesta. Mayweather lo kubri tambe gastu di otro seremonianan ku lo tuma lugá den diferente suidat rònt Merka. Den pasado tambe Mayweather a yega di yuda den tipo di kasonan similar. Otro artista i selebridatnan lambe a djòin e kousa. E rèper Drake a ofresé un ayudo finansiero di 100-mil dòler na e organisashon National Bail Out, ku yuda esnan ku a keda detené pa polis durante e protestanan. E kantante The Weekend tambe a hasi donashon di 500-mil dòler repartí riba varios organisashon, entre nan ’Black Lives Matter Global Network’ i e kampaña ‘Know Your Rights’ di e hungadó di fútbòl merikano Colin Kaepernick.