Minister Koeiman : Ta un akto di rabia a tuma lugá na pisina Enith Brigitha. (VIDEO)

Den oranan di mardugá deskonosínan a kousa bastante daño na pisina Enith Brigitha den Sentro Deportivo Kòrsou. Nan a tira diferente artefakto den e pisina. Ademas a basha zeta tambe den e awa i den e ‘pomphuis’ di e pisina. E malechornan a destruí tambe e bòrchi ku nòmber di e pisina i tira e lèternan den e pisina. Algun luna pasá Reda Sosial a entregá e pisiná renobá bèk na FDDK, despues ku pa vários luna e pisina a keda será. Debí ku a haña bakteria den awa di e pisina, no tabata responsabel mas pa laga muchanan tuma lès di landamentu, ni hasi uzo di e pisina. Na okashon di e re-apertura, e propio medayista olímpiko Enith Brigitha tabata presente ora ku a hasi desvelo di e bòrchi ku su nòmber.

Den un promé reakshon, minister di SOAW, Hensley Koeiman, ku tin deporte mashá na pechu, a deklará pa TV Direct ku na su impreshon no ta trata di un kaso di muchanan baldadi, sino mas bien un akto di rabia.

Minister Koeiman a splika ku mester bin kamara, pa evitá ku ta sigui pèrhudiká nos muchanan den nan desaroyo deportivo.

[if !supportLineBreakNewLine] [endif]