Gobièrnu a pone direktor di depertamentu di komunikashon riba non-aktif.


Den karta ku promé minister Eugene Rhuggenaath a manda pa su ministerio, e ta informá di e desishon pa prohibí entrada na Roxienne ‘Jenny’ Albertina den ofisinanan di gobièrnu. Albertina ta hefe di e departamentu di komunikashon di gobièrnu. E desishon ta debí na vários keho kontra Albertina. For di 2005 tin informashon i diferente rapòrt di kehonan konstante relashoná ku e manera di funshoná di e direktor, pa ku su koleganan i otronan. Na interes di e investigashon promé minister Rhuggenaath a prohibí entrada na e direktor, entrante 7 di yüni. E desishon ta basá riba artikulo 46, insiso 1 di ‘Landsverordening Materieel Ambtenarenrecht’. E prohibishon ta konta pa tur departamentu den Fòrti i otro servisionan di gobièrnu. Tin un eksepshon riba e prohibishon ku por sosodé solamente ku outorisashon di promé minister, den kaso ku Albertina mester presentá pa deklará den kuadro di e investigashon. A base di e investigashon lo tuma un desishon final pa ku señora Albertina. Lo no buska un remplasante temporal. Mientras tantu sekretaris general di e ministerio di asuntunan general, lo keda na enkargo di e trabounan di Albertina.