Outoridatnan a detené direktor di Hector Henriquez. (VIDEO)


Den oranan di djaweps mèrdia outoridatnan a presentá na e negoshi di importashon Hector Henriquez riba Caracasbaaiweg i a detené direktor di e kompania Terence B.

Den oranan di mainta, un tim multi disiplinario di gobièrnu huntu ku polis a bolbe presentá na Hector Henriquez kaminda a bolbe haña varios produkto ku a kaduká, skondé den un kònteiner i tapá ku palèt. A topa entre otro karni, nuggets, batata i hopi kos mas den kònteinernan. A topa produktonan ku a kaduká for di 2011. MEO a haña na sigur 4 kònteiner ku kos daña. GGD a duna órden pa destruí tur kos.

Den un komunikado Ministerio Públiko a konfirmá ku e detenshon ta relashoná ku e kòntròlnan di e tim multi disiplinario. E direktor a haña un atvertensia kaba, pero atrobe su kosnan no tabata na òrdu. A presentá e sospechoso na Fiskal ousiliar pa skucha su deklarashon. Ta sospeché di violashon di vários lei, falsifikashon di dokumento i estafa. Djabièrnè Fiskal ta disidí si lo presenté na Wes Komisario. Mientras tantu e kompania Hector Henriquez lo por sigui duna servisio nòrmal, pero por lo pronto nan no tin mag di bende produktonan frui.