Pa di dos dia sigui Kòrsou a sinti efektonan fuerte di temblor. Den tur dos kaso, e temblor a tuma lugá den oranan di mainta. Djabièrnè mainta masomenos kuartu pa nuebe, vários area rònt Kòrsou a sinti e efektonan di e sistema. Den un promé boletin Meteo di Kòrsou ta papia di un temblor ku magnitut di 5.8 ku su episentro na kosta nòrt di Coro na Venezuela. E temblor tabatin un profundidat di 10km. E temblor ku a surgi a kousa daño na edifisio, kaya i algun negoshi na Kòrsou. Den algun kaso tabatin trahadó ku a bira malu, debí na spantu. Na momentu ku e suseso a tuma lugá vários kompania, entre otro SVB, WTC i MCB a evakuá nan trahadónan. Meteo ta vigilá e situashon i no ta spera ‘after shock’. Nan ta den kontakto ku koleganan di servisio metreológiko na Venezuela pa analisá e situashon. Segun Meteo Kòrsou, no tin peliger pa un posibel tsunami.
MEDIDA DI PREKOUSHON DEN KASO DI TEMBLOR:
Si bo ta paden, drumi abou, kubri bo mes i wanta duru, durante di un temblor.
Buska protekshon bou di mueble fuerte, òf drumi abou riba bo banda robes i tapa bo kara. Si bo ta pafó durante di un temblor, buska un lugá habri i drumi abou riba bo banda robes i tapa bo kara. Si bo ta den vehíkulo durante di un temblor, hala na kantu, i evitá palu di lus i koriente i brùg, si ta posibel.
[if !supportLineBreakNewLine] [endif]