Minister di Ekonomia Eugene Rhuggenaath ta enfatisá ku e situashon na InselAir ta hopi difisil. Minister Rhuggenaath a splika ku el a tuma nota di klientenan rabiá i eskpreshonnan negativo tokante InselAir riba retnan sosial. “No tin konfiansa mas den e kompania i den e sentido ei nos ta den dekadensia. Mester bin un kambio drastiko,” asina minister Eugene Rhuggenaath a splika prensa. Den e siman ku a pasa a informá pueblo ku gobièrnu a fia InselAir, 35 mion florin. Ademas, e CEO nobo, Gilles Filiatreault a presentá su mes na prensa. “Nos ta den un situashon kritiko, pero ta posibel ku InselAir por drecha e situashon. Pa esaki e próksimo simannan lo ta krusial,” segun minister Rhuggenaath. E CEO nobo a bai di akuerdo pa entregá un plan di stabilidat pa e kompania, na fin di febrüari.