VBC ku kaso kontra ministerio di SOAW.


Asosashon di Komersio i Industria di Kòrsou (VBC) a entrega un keho kontra minister di SOAW. VBC ta di opinion ku minister di SOAW no a duna un motivashon sufisiente tokante e medida pa oumentá suèldu mínimo. Nan no ta di akuerdo ku e manera ku minister di SOAW a tuma e desishon pa subi sueldo mínimo sin konsulta partnernan sosial i sektor empresarial. Presidente di VBC Joop Kusters a indiká ku semper gobièrnu a enfatisá riba importansia di Diálogo Nashonal, pero den e kaso akí, ku ta un tópiko importante, gobièrnu a disidí pa no entrega e proposishon den Diálogo Nashonal. E plan pa subi sueldo mínimo tin konsekuensianan grandi pa Kòrsou, segun Kusters. Promé ku VBC a entrega e kaso a hasi un apelashon serio riba gobièrnu pa rekonsiderá e desishon pa oumentá sueldo mínimo entrante promé di yanüari 2017. Esaki no a tuma lugá i VBC a prosedé na entregá un keho kontra e minister. Minister di SOAW e temporada ei, Ruthmilda Larmonie-Cecilia a base di un areglo ministerial di 9 di ougùstùs 2016, a oumentá sueldo mínimo ku 9.8% pa despues kontinuá ku un subida pa e siguiente tres añanan pa yega na un nivel di subida di 40%.