Kantidat di hurado. Hurado di Festival di Tumba ta husga den 3 kategoria. Kategoria 1 : Letra, melodia i entonashon Kategoria 2 : Ritmo i Areglo Kategoria 3 : Ambiente di Karnaval Festival di Tumba konosé un total di 12 miembro di hurado. 5 miembro pa letra, melodia i entonashon, 4 miembro pa ritmo i areglo i 3 miembro pa ambiente di karnaval. Miembronan di hurado tin komo tarea pa husga e tumbanan segun reglanan di e asosiashon di manera ophetivo i duna e puntuashon korespondiente i konforme e tabla di puntuashon. Miembronan di hurado mester tin sierto kapasidat pa por bin na remarke komo miembro di e kuerpo. Hurado pa letra, melodia i entonashon. Miembronan di hurado pa e kategoria di letra, melodia i entonashon primeramente mester tin konosementu di e idioma Papiamentu i preferensia ta bai na un persona ku ta kompositor, eskritor òf deklamadó. E persona mester tin konosementu di müzik di Kòrsou i ta gusta ambiente di karnaval. Tambe e mester tin un bon oido melódiko i konosementu i eksperensia den e ramo musikal pa e por rekonosé liñanan melódiko. Finalmente e persona mester ta íntegro i imparsial. Hurado pa ritmo i areglo. Pa miembronan di hurado ku tin e tarea pa huzga ritmo i areglo, aparte di e eksigensianan ya deskribí, e persona mester tin eksperensia den e ramo di músika i konosementu di harmonia. Hurado pa ambiente di Karnaval. Pa miembronan por huzga e aspekto ambiente di karnaval e persona por ta miembro di un grupo di karnaval Puntuashon. Pa e promé kategoria di letra, melodia i entonashon por optené un máksimo di 225 punto. Kada un di e 3 aspektonan ta keda huzga individualmente. Pa letra e tumba por risibí un máksimo 75. Aspektonan relevante pa husga letra ta ku e letra mester ta hopi kreativo i original (50 punto). Tambe e mester tin un kontenido koherente i ta komprendibel pa tur hende (25 punto). Pa e aspekto di melodia por optené un total di 75 punto. Puntonan ku ta keda husga ta si e melodia ta “catchy” i fásil pa kanta (50 punto) i tambe si e melodianan tin aspektonan nobo den dje ku no ta zona meskos ku tur otro tumba for di kuminsamentu te final (25 punto). Pa último aspekto di entonashon tambe por risibí un máksimo di 75 punto. E eksihensha ta ku e intérprete mester kanta den e tono korekto.
E di dos kategoria ku ta keda husga ta ritmo i areglo. Pa e kategoria aki por risibí un total di 125 punto. Ta husga e parti di ritmo basa riba si e ritmo di tumba ta unu “catchy”, si e ta bon “será” i ta duna gana di baila i si e ritmo tin un bon ritmo pa marcha riba dje, pues no muchu purá ni muchu lento. Por risibí un máksimo di 50 punto esaki. Pa areglo por risibí un máksimo di 75 punto. E areglo mester ta kreativo, original, apart i no mester parse piesanan eksistente. E areglo ta bunita i komprendibel (25 punto). Aspektonan musikal manera harmonia, dinámika, klave ta hopi bon (25 punto). Finalmente e areglo mester ta funshonal den e piesa. E relashon entre e diferente komponentenan mester ta bon. Pues e sinkronisashon entre komposishon, kantante, agrupashon musikal i areglo mester ta bon. Ta tene kuenta ku ehekushon di e areglo di e agrupashon musikal i si e areglista a tene kuenta tambe ku e habilidatnan vokal di e intérprete (25 punto). E di tres i último kategoria ku ta keda husga ta ambiente den kaya. Pa esaki por risibí un total di 50 punto. Ta husga si e piesa ta dushi pa “jump” riba dje, pues e no mester ta ni muchu purá ni muchu lento (10 punto). Tambe e piesa tin sufisiente variashon pa no bira monótono (10 punto). E piesa ta fásil pa kapta, e ta fásil pa kanta i e koro ta karga e piesa di forma korekto (15 punto). Finalmente e piesa mester tene e públiko presente interesá for di kuminsamentu te final (15 punto).