Miembronan di Staten no ta satisfecho ku e presentashon di Aqualectra relashoná ku e problemanan den entréga di koriente dor di Aqualectra i Refineria di Kòrsou (RdK)/Curaçao Refinery Utilities (CRU). E opinion general di e parlamentarionan tabata ku e asuntu ta demasiado tékniko i kada biaha t’e mesun historia. E presentashon a keda hasí pa Henny Barbolina, interim-plantmanager di RdK/CRU i Darick Jonis, direktor di Aqualectra. Miembro di staten, Elsa Rozendal (MAN) a bisa ku a hiba palabra na final di e reunion: “Pueblo no ta interesá den tur e istoria téknikonan ei, sino ke sa ki dia por garantisá entrega di koriente i si e aparatonan elektro-doméstiko ku a daña ta keda kompensá.”
”E palabra “schakel” ta un palabra non grata’. Nos por tende esaki mas. E ekspreshonnan ‘sabotahe’ òf ku ta ‘muchu kayente na Kòrsou’, ta preteksto i nada nobo. Ta bon ku awor tin tres komishon (un hurídiko, un finansiero i tambe un tékniko), ku ta bai traha na sinkronisashon entre CRU, RdK i Aqualectra, manera e direktornan a anunsiá, pasobra ta blo keda tira falta riba otro.” asina Parlamentario Marilyn Alcallá-Wallé (PAR) a bisa.
Segun Stephen Walroud (PAR), : “Segun Aqualectra CRU no ta entregá sufisiente koriente na e kompania di utilidat públiko, manera ta palabrá den e kontrakt i Refineria Isla ta bisa ku no ta eksistí niun kontrakt i ku Aqualectra ta paga demasiado tiki. Esaki ta kontradiktorio.” E duo di PAR, ta boga pa temporalmente instalá un komishon di Staten ku tin di aber ku maneho di energia. Humphrey Davelaar (PNP) tambe ta haña esaki un bon idea. Segun Eduard Braam, e hendenan gewon ke sa ki dia nan ta haña koriente konfiabel na un bon preis. Marilyn Moses (MP) ta puntra su mes si a tuma desisihonnan na tinu i si a fiha prioridatnan bon. “A invertí pa miónes den un programa atministrativo i den mididónan SMART, miéntras tin poko kapasidat pa proveé koriente pa tur kas. Por a drecha Mundu Nobo tambe i laga esaki sirbi pa bèkòp, pero mester a basha esaki abou,” asina Moses ta bisa. Gassan Dannawi (MAN) tabata kontentu ku un organisashon nobo “Organisashon Pro Akshon pa Kalidat Duradero (Opakd)”, ku ta para pa entrega konfiabel di koriente dor di Aqualectra.
Finalmente minister di Finansa, Kenneth Gijsbertha (MAN), ku tabata presente den e reunion huntu ku promé minister, Hensley Koeiman (MAN) a haña 150 pregunta, ku nan lo kontestá den dos siman.