Gregory Elias i Rosen College ta lansa programa pa maneho den mundu di entretenimentu.


Pronto hóbennan for di rònt mundu por sigui e programa di Gregory Elias Entertainment Management na Florida, asina e korant Extra ta raportá. E programa a kuminsá na ougùstùs i ta pèrtenesé na Rosen College of Hospitality Management di UCF College of Arts and Humanities na Florida. E instituto a traha un “undergraduate program” pa desaroyá futuro lider den industria di entretenimentu. Ku e estudio, alumnonan por haña e título di “Bachelor of Science in Entertainment Management”. Segun e vishon di Elias, e industria mester di mas hende eduká, hendenan kreativo ku ta prepará pa dil ku retonan di futuro i krea un mundu mas mihó i harmonioso. Kultura i arte por hasi esaki. Elias ta bisa : “Ora bo skucha un kantika bunita òf wak un pintura hopi spesial, e ta elevá bo”. Riba e wèpsait di Rosen College ta bisa ku Gregory Elias a nase na Kòrsou i traha komo empresario. Hinter su bida e tabatin interes pa musiká i arte. Su pashon pa filantropía i e ròl ku entretenimentu ta hunga den su bida, a forma base pa e kolaborashon ku Rosen College. Elias a kontribuí ku hopi sèn pa realisashon di e programa.