Aruba a sera akuerdo ku Tesla pa haña bateria spesial.


Durante e di shete konferensia Green Aruba ku a tuma lugá siman pasá, e kompania di awa i elektrisidat di Aruba (WEB), a sera un akuerdo ku e kompania inovativo den energia alternativo Tesla. Ya pa un tempu kaba, Aruba ta hopi aktivo riba e tereno di energia alternativo. Asina por ehèmpel e isla a kombertí e dak ku ta kubri e lugá di parker outo na aeropuerto di Aruba den un vèlt grandi di panelnan solar. Esaki sin mas ta kontribuí na stabilidat i kresementu den suministro di energia limpi pa e isla. Awor Aruba ta dal un paso mas, ku e akuerdo importante ku a sera ku Tesla. E kompania merikano Tesla ta konosí pa su ideanan inovativo riba tereno di energia alternativo. E akuerdo ku Tesla ta enserá entre otro ku e kompania lo bai produsí baterianan spesial pa por warda energia. Pa otro aña e projekto lo start ku e entrega di e promé baterianan komersial, pa por warda energia alternativo na Aruba.