Produkshon di koriente na Kòrsou na e momentu aki ta hopi delikado. E kapasidat ta nèt sufisiente i no tin reserva. Ademas e demanda pa energia e aña’ki ta mas grandi ku na 2014 i 2015. Aqualectra ta studia si e oumentu di demanda pa elektrisidat ta unu struktural. Si esei ta asina, e orei lo mester amplia e kapasidat riba término largu. Asina direktor di Aqualectra, Darick Jonis a bisa den un rueda di prensa di urgensia. El a splika tambe algun detaye pa fin di aña, ku ta pone ku ta uza mas energia, ku e konsekuensha ku koriente ta kai afó. E situashon no ta alarmante, pero sí kuidadoso, segun Jonis. Despues ku áwaseru a afektá un mashin na Dokweg, koriente ta kai afó na Banda Riba i Banda Bou pa sigur dos ora. Huntu ku esei Curaçao Refinery Utilities (CRU), ta entregá ménos koriente ku tabata nesesario i no tabatin koriente disponibel for di e mulinanan di bientu. Aqualectra no tin kapasidat di reserva pa kai bèk ariba i esei a kousa ku mester a bai over na saka sierto parti di Kòrsou, for di e ret di Aqualectra. Jonis ta spera ku na kuminsamentu di yanüari ku e situashon lo mehorá.