Den un komunikado e kompania di aviashon Insel Air ta pidi diskulpa pa e inkumbiniensha ku retraso i kanselashon di nan buelonan a kousa pasaheronan últimamente. Un di e motibunan, segun e kompania ta e situashon finansiero aktual di Insel Air, ku ta hopi delikado. E situashon finansiero ta debí na un debe di mas ku 100 mion dollar ku Insel Air tin habrí na Venezuela. Pa mas ku seis aña Venezuela tabata un merkado krusial pa derecho di eksistensha di InselAir. Pa motibu di e debe mester a bandoná e merkado parsialmente. Aparte di otro ehersisionan, e kompania a bini ku rutanan alternativo den nos region pa mantené e organisashon i infrastruktura di InselAir i sigurá trabou di su 750 empleadonan. Sinembargo, e tardansa den pago di Venezuela ta un preshon konsiderabel riba e organisashon i ta pone ku e kompania ta enfrentá un reto finansiero grandi na e momentunan akí. Pa algun tempu kaba InselAir ta den kòmbersashon ku un partner stratégiko pa logra haña invershonnan importante i pa alabes yega na un flota mas hoben. E kompania ta spera ku riba término korto por pone e servisio riba e nivel atrobe. Den luna di sèptèmber InselAir ta spera e grupo di pilotonan nobo ku a keda atkirí resientemente i tambe e regreso di algun avion ku tabata for di sirkulashon pa mantenshon.