Kayanan di Kòrsou tabata práktikamente ketu ketu den oranan di djaweps anochi. E mensahenan di alerta a yega na pueblo pa prepará i evitá pa ta riba kaya. Un poko mas tempran anochi a spera ku pa 11or ya lo a kuminsá sinti efektonan signifikativo di orkan Matthew, sinembargo tempu tabata bastante trankil. Algu despues di 12 di mei anochi, Meteo e saka e siguiente boletin di tempu. Situashon general : Tormenta tropikal Matthew a desaroyá den un orkan durante oranan di awe trai mèrdia i ta move den un direkshon wèst. Matthew lo influensha nos tempu durante e próksimo 24 ora i bientu lo bira gradualmente di nortwèst i durante djabièrnè mainta for di un direkshon sùit. E regionnan di áwaseru ku ta originá dor di e sistema aki ta pasando riba nos isla i lo sigui pasa periódikamente.
Riba pòrtret di radarnan aki ku a tuma for di e Weather App di Meteo bo ta mira kon Matthew ta pasando nòrt di Kòrsou baiendo direkshon wèst. Loke nos ta bai sinti den e próksimo oranan ta kambio di e direkshon di bientu ku dado momentu lo supla den direkshon oost i sùit-oost. Tambe nos lo haña áwaseru durante sierto momentu. Ta spera ku mas den oranan di mardugá i mainta e awaseru ku a antisipá lo kuminsá kai. Klek riba imágen pa mira fotonan grandi.
