Pastor Norwin Josepa a fayesé awe mainta.(video)


Pastor Norwin Josepa a fayesé. E tabata lider di Ministerio Mas Bida Abundante. Na 1975 Pastor Norwin Josepa a stòp ku skol i el a kuminsá traha na korant Amigoe. Esei tabata su promé trabou. Di ei el a keda traha den prensa durante 38 aña na vários korant, entre otro Último Notisia i mas resien La Prensa. Norwin a traha tambe na Curaçaosche Courant. Pa un pèriodo kòrtiku el a traha na Aruba pa yuda den lansamentu di e promé korant diario na Aruba. Norwin ta deskribí su mes komo un hòmber trahadó, ambisioso i ku hamber pa sigui siña kosnan nobo. Esei mes a kondusí na su promé kolumna di farándula den korant titulá “Nos Tertulia”. Den e periodo ei el a organisá konsiertonan grandi ku artistanan manera Yellowman, Alpha Blondy i Ziggy Marley na Kòrsou. Banda di tur su éksitonan, Norwin ta konta ku el a kai den drogadikshon i a bira un chòler riba kaya. “Mi tabata biba riba kaya, drumi abou i buska kuminda den ko’i sushi. Mi no tin bèrguensa di mi pasado. Ta ami mes a skohe p’e i mi ta para responsabel p’e”.

Pastor Norwin ku su kasá Shermelin Josepa. (Kortesia : FB)

Na yanüari di aña 1993 el a stòp ku adikshon i drenta un programa di rehabilitashon. E mester a stòp ku e programa, debí ku gobièrnu di e tempu ei a para supsidio pa e sentro. El a bai biba serka un amigu di dje, pero el a bolbe kai den adikshon. Na yüli di e mesun aña, el a bolbe drenta un otro programa pa rehabilitá i el a keda 6 luna ei nan. No opstante di esaki, el a bolbe kai den adikshon. Pastor Norwin ta splika ku “loke hopi hende no ta komprondé di adikshon ta, ku no ta kuestion di stòp, sino di un kambio di bida”. Ku ayudo di famia Irasquin, na 1994 el a drenta un sentro di rehabilitashon na Miami. I ta aki el a logra siña kon pa kambia su bida. El a bin komprondé ku e motibu di su adikshon tabata pasó e no tabata stima su mes. “Nos mester kuminsá stima nos mes i otro nan”. “No tabata mi intenshon pa bin Kòrsou i bira Pastor, aunke for di chikí mi kier a bira pastor. M’a kuminsá papia ku hende i kompartí mi testimonio. Despues ku vários hende tabata enkurashami, m’a disidí di kuminsá prepará mi mes i na 2002 m’a kuminsá prediká ofisialmente.”

VIDEO : Testimonio di Pastor Norwin kon el a logra superá su malesa na un okashon anterior. (sosegá na pas)

Na 2012, Pastor Norwin Josepa a tuma su retiro for di korant La Prensa i a kombertí su hòbi den su negoshi. Kingdom Experience Bookstore & Nutrition Centre a habri su portanan. Últimamente e tabata dediká su bida na su Iglesia Ministerio Bida Abundante, ku por a skucha tambe tur mainta via Radio MAS 99.7 FM Pastor Norwin Josepa semper kier a enkurashá tur hende ku tin kualke problema o karga, pa no deskurashá. Tene fe i perseverá, pasó Dios lo yudabo superá eksitosamente. Den e lunanan ku ta tras di lomba Pastor Norwin a bira malu atrobe i lamentablemente awe mainta el a fayesé. Pas na su restunan. Pastor Norwin Josepa sosegá na pas.