Insel Air tin problema i falta piloto.


Insel Air falta sigur 4 pa 5 piloto pa por kumpli ku nan skema di 70 buelo pa dia. Esaki segun direktor di e kompania Edward Heerenveen, ta un dje motibunan di retraso den buelonan di Insel Air. Aparte di esaki e problema di avionnan dañá tambe ta motibu di e retrasonan. Pero Heerenveen ta enfatisá ku aktualmente no ta atraktivo pa pilotonan traha na Kòrsou. Pa e motibu ei mes, vários piloto ta opta pa bai traha pa otro kompania. Segun Heerenveen, Servisio di Aviashon a kambia nan reglanan resientemente i esaki tambe ta afektá e kompania. Un piloto tin mag di bula un kantidat di ora fiho segun lei. Si unu kai afó, mester kombiná buelo. Banda di esaki, e profeshon di piloto no ta pèrmití overtaim o traha ilegal. Tur e faktornan akí ta pone ku Insel Air tin problema pa yena e vakaturanan. Segun Heerenveen e situashon ta urgente. Ademas e kompania ta konsiente di hopi reklamo ku tin di biaheronan, pero ta enfatisá ku e kompania ta opta pa no bula ku avionnan dañá.