Willemstad - World Health Organization (WHO) tin intenshon pa durante e luna di mei, lansa un ‘app’ via kua tur hende por chèk pa nan mes si nan ta infektá ku coronavirus. Asina e manager di informashon WHO, Bernardo Mariano a deklará na Reuters. Un usuario por yena den e ‘app’ kua ta su sintomanan i e lo haña un indikashon si e ta kontagiá òf nò. Ademas e usuario lo haña informashon kon e por hasi tèst pa e virus den su pais. WHO ta spera ku prinsipalmente paisnan den Sur Amerika i Afrika lo has uzo di ‘app’. E kantidat di kasonan den paisnan den desaroyo ta oumentando i den mayoria die paisnan no tin e teknologia pa desaroyá tipo di ‘app-nan’ asina. WHO ta den kombersashon ku Apple i Google pa mira tombe kon por desaroyá un sistema pa via ‘bluetooth’ detektá hendenan ku tin coronavirus o si nan a bin den kontakto ku un pashènt infektá. Sinembargo te ainda WHO no a logra añadí e funkshonalidat, debí na motibunan legal i protekshon di privasidat. Varios pais manera Merka, Inglatera i tambe Ulanda ya ta trahando riba nan propio ‘app’ pa detektá mas fasil hendenan ku tin coronavirus.
Comments