Amsterdam - Djamars atardi a drenta e notisia ku e konosido reportero hudisial ulandes, Peter R. de Vries a ser tirá den Lange Leidsedwarsstraat na Amsterdam. Asina fuentenan a informá NOS. De Vries a kaba di sali for di su presentashon den RTL Boulevard ora ku un hòmber deskonosí a lòs sinku bala riba dje. Segun e fuentenan De Vries lo a sufri herida di bala na su kabes. Riba retnan sosial tin varios video basta grafiko di e insidente, kaminda por mira klaramente ku De Vries a risibí bala den kabes.
A trasportá Peter R. de Vries (64) ku urgensia pa hòspital. Polisnan a start un buskeda masal riba un hòmber delegá, koló habrí, ku tabatin un ‘jas’ bèrdè skur bistí i un pèchi pretu riba su kabes. Outoridatnan ta pidi tur hende ku señalá e hòmber, pa no aserké, sinó yama e number di emergensia 112. De Vries tabata prinsipalmente konosí komo investigadó i reportero hudisial. Ademas e tabata fungi komo bosero i persona di konfiansa den diferente kaso polisial i hudisial. Entre otro e tabata bosero di e testigu klave Nabil B. den e kaso Marengo. Debí na e kaso akí, for di 2019 De Vries tabatin vigilansia personal, pasó e tabata riba lista di asesinato di e Ridouan Taghi, ku ta e sospechoso prinsipal den kaso Marengo. Na 2019 a asesiná tantu ruman komo abogado di e testigu Nabil B. Diferente polítiko i personahenan popular na Ulanda a reakshoná di shòk pa e suseso lamentabel ku a tuma lugá den pleno Amsterdam.
Comments