Karnaval 2020 dediká na Stanley Ignacio.


Konferensia di Prensa relashoná selebrashon di Karnaval 2020

Willemstad - Durante un Konferensia di Prensa, Fundashon J.A.G. a duna informashon relashoná ku selebrashon di 50 aña Karnaval na 2020. Presidente Juni Aniceta a kuminsá na aklará ku debidamente J.A.G. a entregá su relatonan finansiero. Kontrali na informashonnan robes ku tabata sirkulá riba retnan sosial. Lizette Sambo-Velder di Kas di Kultura a splika ku basá riba e bon maneho di J.A.G. a konsehá Minister pa fundashon mes organisá Karnaval 2020 atrobe. Sambo-Velder a splika tambe ku konformé “subsidieverordening”, Gobièrnu por desviá for di un destaho públiko i ku esaki sa pasa mas biaha. A splika tambe ku a lanta un plataforma formá pa AMAK, Fundashon JAG, CCGG, AGKK, Sektor di Kultura, Fundashon Karnaval Banda Bou, ku e meta pa engrandesé aún mas e selebrashon di 50 aña Karnaval.

Komo Baluarte di Karnaval 2020 a skohe Stanley Juan Ignacio, ku no ta deskonosí den e mundu di Karnaval na Kòrsou. Stanley tin mas ku 40 aña den e mundu di Karnaval, komo organisadó i konsehero di diferente organisashon ku tabata tin Karnaval na su enkargo. Pues pa e di 50 edishon no tabata tin mihó persona.

Pa Pilar di Karnaval 2020 a nombra Ofisina di Turismo (CTB, Curaçao Tourist Board) ku tabata representá pa Ritzel Godfried. Ofisina di Turismo a bin ta ehersé un trabou hopi importante den eksportashon i merkadeo di nos Karnaval. Tambe CTB na varios okashon nan a paga kuenta di organisashonnan ku a keda habri. Komo tal a nombra e organisashon komo Pilar pa edishon 50.

A anunsiá tambe, algun fecha importante den e kalendario pa Karnaval 50.

Dia 3 januari 2020 : Apertura di karnaval ku ‘jump up’ ku ta sali for di Waaigat,

pasa den Pietermaai, Penstraat i bai kaba den stadion di SUBT.

Dia 4 januari 2020 : Apertura di Curacao Carnival Village ku konsierto di Krosfyah, Burning Flames i Kevin Little.

Dia 6 februari 2020 : Eksposishon i Konferensia Karnaval Kòrsou 50.

Dia 7 februari 2020 : Kings and Queens Night ku homenahe na Reina, Prins i Panchonan di e 50 añanan;

Dia 20 februari 2020 : Kompetensia di koreografía pa gruponan di tiner.