Instagram ta bai hasi invisibel e kantidat di ‘likes’ ku un ‘post’ ta haña.

E plataforma sosial Instagram, ku ta parti di e famia di Facebook, a tuma akshon pa hasi e kantidat di 'likes' riba un 'post' invisibel. Instagram a tuma e akshon aki pa baha e preshon kompetitivo entre su usarionan. Ya for di april e kompania a kuminsá apliká e medida na Canada, Brazil i Japón. Awor ta start ku e medida na Merka tambe, ku ta e merkado mas grandi di Instagram ku 106 mion usuario. ‘Loke nos ke logra ta, pa Instagram bira menos kompetitivo’, asina direktor di Instagram, Adam Mosseri a splika e revisita Bloomberg.

Usuarionan por sigui wak nan propio ‘likes’, pero e ‘like-nan’ ku nan haña riba nan ‘post-nan’, lo no ta visibel pa otronan. Algun ‘celebrity’, manera Kim Kardasian, ku tin mas di 150 mion’followers’ i fasilmente ta haña riba 1 mion ‘likes’ pa su ‘post-nan’, ta apoyá e idea i ta kere ku esaki lo ta algu mas sano. Aktualmente e kompanianan manera Facebook, Twitter i Instagram, ta sentro di atenshon den e debate riba e adikshon fuerte na telefòn selular, ku ta asotando hobennan.