Buenos Aires - Djarason mainta, e medio argentino Clarin a informá ku e legendario futbòlista Diego Armando Maradona a fayesé na edat di 60 aña. Maradona tbt rekuperando di un operashon selebral na su kas na Argentina. Den oranan di mainta el a sufri un atake di kurason ku lamentablemente e no a logra superá. Asina su agente i abogado, Matias Morla a informá prensa. Maradona ta ser konsiderá komo un di e mihó fútbòlistanan di mundu. El a logra liderá e selekshon di Argentina na titúlo di kampion den Mundial 1986. Ta durante e mesun Mundial ei ku Maradona a bira konosí tambe pa su famoso ‘Mano de Dios’ kontra Inglatera. Durante su karera, Maradona a skor 34 gol ku e selekshon di Argentina, durante kuater aparishon den Mundial. Na oropa Maradona a hunga entre otro pa Barcelona i Napoli, ku kua tambe el a logra konkistá varios títulonan maksimo. Na 1997 el a retirá ofisialmente di fútbòl. Maradona tabata konosí tambe pa su problemanan ku adikshon na kokaina i alkohòl pa kua na varios okashon el a keda hospitalisá.
Mundu deportivo mundial a pèrdè un kontroversial pero gran futbòlista.
コメント