Demostrashonnan kontra rasismo na Ulanda a kousa tenshon den polítika.


Amsterdam - Despues ku miles di manifestante a presenta riba e plenchi prinsipal na Amsterdam pa protestá kontra rasismo, tabatin hopi kritika riba 'burgemeester' Femke Halsema. Amsterdam a spera ku lo a tabatin entre 200 pa 300 manifestante, sinembargo den apenas algun ora, miles di hende tabata riba otro na Dam. Esaki a kousa kritika debí ku e ta bai kontra e medidanan di ‘social distancing’. Segun Halsema ta solamente ku forsa brutu lo por a plama e multitud for di otro, pero esei lo a kousa mas tenshon. Entrentantu na Den Haag i Groningen tambe tabatin manifestashon e siguiente dia i ei si e gemeente-nan tabata mas skèrpi ku e bishitantenan. Miles di persona a djòin e manifestashon di ‘Black Lives Matter’ riba Malieveld na Den Haag i Grote Markt na Groningen, relashoná ku morto di George Floyd. E 'burgemeester' di Amsterdam a splika den un promé reakshon, ku e no ta mira motibu pa tuma retiro i a keda sorprendé pa e reakshonnan, siendo ku ainda no a analisá e susesonan debidamente ni skucha tur partido. Diferente partido den oposishon a pidi un reunion urgente pa atendé ku e Burgemeester riba loke a sosodé na Amsterdam. Segun oposishon, Halsema tabata sa adelantá ku lo tabatin un multitud grandi ku lo a violá e reglanan pa tene distansia debí na COVID-19.