Dediká na Ced Ride... 'Nos a biba, kompai'.


Danki pa bo amor, mi yave. M’a dunabo tur loke mi tabata por i tin. M’a dunabo ku kurason habrí… ku alma sinsero.

Danki pa bo amor, mi yave. Dos alma bunita ku mester a topa otro pa konektá asina divino. Pa biba… pa kompartí. Den promé tabata djis un amistat… Pero ku tempu m’a komprondé proposito i biba divinidat den bo presensia.


Ki ora ku b’a yama, m’a sali pa sirbi bo. Ki ora ku b’a pidi, m’a yega pa kumpli. M’a dunabo tur loke mi tabata por i tin. M’a dunabo te na último… Ku e mesun alma habrí, e mesun amor sinsero… Ta lus a atraé lus. Ta lus a keda atraé lus... no opstante di tempu o distansia. Pasó Dios su proposito tin forsa... i nos a bib'é.

Nos a kana mondi i nos a mira hopi mardugá… Kome aros afrikano den festival na Bèlgika. Nos sintá den balkon te habri mainta, pa mi alma por a kolektá tantu historia i hazaña.

B’a priñami ku e amor profundo ei ku bo tin p’é pida baranka ‘ki. B’a siñami balor di mi eksistensia… Poder i presensia di nos antepasadonan.

No ta tur hende lo komprondé un konekshon divino. Nos tribi di bib’é, kompai… i kolektá asina tantu eskperiensia bunita. Nos a kòrda i hari…

Bebe ròm i selebrá… pasó nos a kolektá momentunan divino. Nos a skucha alma… i tribi di kana segun Dios a guia. M’a kana den presensia serkano di un Spiritu Grandi. M’a kana den un proposito ku Dios mes a destiná. M'a esksperensia dj'aserka... i manera mi tabata por i sa... M'a kuida i alimentá bo lus sin igual.

P’esei awe mi tin un pas.

Pero no opstante dj'esei... lo mi sinti bo falta, mi bròder. Sintá den bo balkon algun siman pasá, ata nos ta hari atrobe. M’a yega bo kas atardi den un pal’í awa. Nos a habri ku otro atrobe… mané kustumber. Almanan sunú ku intenshon sinsero. Pa simplemente kompartí... Pa simplemente biba i kolektá... Nos a papia di polítika, nos a papiá di muhé, nos a papia di bida. Nos a kompartí… un último seshon nos dos so den veranda ei. I atrobe b'a konfiami mas historia ku mi'n tabata sa. Pasó bo ta'tin asina tantu pa duna i kompartí. Konosementu, sabiduria, amor... Pero ya m’a sinti e dia ei ku bo tabata un poko kansá. I tòg, kasi bo’n ta ke pa mi bai… B’a kue un forsa… lanta fo’i bo stul di zoya pa bo kana bin mi tras… Pa bo bisami… segun mi ta bai... 'Kompai.. nos tin ku topa atrobe… pasó m’a haña un ivitashon pa bai Cuba aki’…

Ki ora ku nos a topa ta’tin lus. I no opstante di tantu energia ajeno, ku no por a komprondé nos konekshon. Nada no por a para e forsa divino di Dios su proposito. Nada no por a stroba nos almanan di konektá, sinti, biba i kolektá.

Nos a biba. Nos a biba mes, kompayo.

Mi ta hari, mi ta yora. Mi so ta kòrda… Kon dushi bo por a kushina pa ami i otronan kome. Kuantu sekretonan profundo b’a konfiami. B’a pidimi warda e tesoronan mas balioso di bo kolekshon. Nos último brasa… 2 di yüli 2021 Mané semper ora nos topa… E brasa di nos kurasonnan pegá na otro.

B’a yamami ku bo alma… M’a sinti bo energia… M’a skucha mi alma i m’a sigui segun Dios a guia. M’a kumpli ku bo deseo atrobe. M’a bisti na kòrá, pa mi selebrá bo. Pa mi selebrá bo… un último biahá ku bo wowonan habri i bibu. Ku bo opinion skèrpi… i bo orguyo fuerte. Te na último. Bo ta ken bo ta... genuino.

B’a ser’é bunita, kompai. Mané abo so por. Broma awo’… :-)

B’a yamami ku bo alma. Pa bo gradisí pa tur loke nos a kompartí. E gratitut ta mutuo. E pida aki di nos proposito ta kompletá.

Mi no ta yama ayó. Lo b’a bisami me'un ko’. Brasa!


[di Morgan pa Ced - 140721]