Banko Sentral a pone ACU bou di kuratela suavisá.


Willemstad - Den e dianan ku a pasa, Banko Sentral di Kòrsou i Sint Maarten a nombra dos kuratòr na e banko lokal di spar i kredito, ACU. Esaki ta pará den un komunikado ofisial di Banko Sentral. E idea ta ku e kuratòrnan lo funshoná huntu ku e direktiva i hunta di supervishon di ACU, mientras ku tur desishon den ACU mester tuma lugá awor den palabrashon ku e kuratòrnan apuntá pa Banko Sentral. Konsiderando ku tur e organonan di maneho den ACU ta den funshon nòrmal ainda, ta papia di un media suavisá di supervishon di parti di Banko Sentral. Den un kaso mas ekstremo Banko Sentral por a pidi wes pa un intervenshon mas severo i pone e organonan di maneho den ACU un banda.

E medida di Banko Sentral pa apuntá dos kuratòr den ACU, ta konsekuensia di no a kumpli ku instrukshonnan ku ACU a risibí for di aña pasá. Na sèptèmber i dezèmber, Banko Sentral a duna òrdu pa hasi un restrukturashon amplio den ACU. Sinembargo ACU no a kumpli ku e ocho (8) puntonan den e instrukshon akí. Esaki por parte tin di haber ku e situashon tenso ku tabata reina den ACU aña pasá, na momentu ku a baha e direktiva koriente pa pone un direktiva temporal. Na sèptèmber e direktiva temporal a haña e promé instrukshon di Banko Sentral. A sigui diferente kaso den korte i na yanuari di e aña aki e dos direktivanan a yega na un akuerdo pa trese trankilidat bèk den ACU. E direktiva koriente a tuma mando bèk na febrüari, sinembargo na mart, ora ku kier a kuminsá ku implementashon di e instrukshonnan di Banko Sentral a surgi e situashon di coronavirus na Kòrsou. Konsekuentemente Banko Sentral a konsiderá ku ACU no a kumpli ku e instrukshonnan i a nombra e kuratòrnan den e banko. No ta konosí ainda pa kuantu tempu e kuratòrnan lo keda den ACU.